Haradinaj-Stublla i reagon Gërvallës për lejën që MPJ ia dha Petkoviqit

39
 haradinaj-stublla-i-reagon-gervalles-per-lejen-qe-mpj-ia-dha-petkoviqit

Haradinaj-Stublla, nëpërmjet një postimi në ‘Facebook’, ka thënë se ministrja Gërvalla-Schwarz i ka dhënë leje për tri ditë Petkoviqit, në kohën kur qeveria e Serbisë ndan para për strukturat paralele serbe në Kosovë.

“Dhënia e lejes për vizitë në Mitrovicë e në Deçan, me shpresë për respektim të marrëveshjeve të Brukselit – dikujt që sa herë ka ardhë ka shkelur ato, ka shpërndarë gënjeshtra historike e politike kundër nesh, ka mohuar krimet e Millosheviqit, ka mohuar ekzistencën e Republikës së Kosovës, ka keqpërdorë për qëllime politike Manastirin e Deçanit dhe vazhdon të mbajë ilegalisht në burg në Serbi dy qytetarë të Kosovës, është njejtë sikur t’a ushqesh ujkun me shpresë se nuk do të të kafshojë”, deklaroi ajo.

“Për më keq, leja për vizitë i ipet Petkoviqit vetëm 3 ditë pasi që qeveria e Serbisë ndan 4 miliardë dinarë për dhënie të ndihmave monetare, ndërtimin e shtëpive, spitaleve, çerdheve, e shkollave në Kosovë në mirëmbajtjen e strukturave paralele të Serbisë, 13 prej të cilave i përuroi edhe sot për qytetarët serb siç i quan ai ‘të rrezikuar’ – dhe si rëndom edhe sot shkeli frymën dhe zotimet e marrëveshjeve të Brukselit”, shtoi tutje Haradinaj-Stublla.

Sot në mëngjes Drejtori i të ashtuquajturës Zyra për Kosovën në qeverinë e Serbisë, Petar Petkoviq ka dorëzuar çelësat e 12 banesave në Mitrovicën e Veriut, donacion nga Serbia.

Petkoviq ka thënë se ndërtimi i banesave në Mitrovicën e Veriut është indikatori më i mirë se sa shumë Serbia investon për serbët në Kosovë.